تورتة على شكل شنطة والمكياج بتاعها

تاريخ التسجيل : 21/08/2015

اسم الوصفة : تورتة على شكل شنطة والمكياج بتاعها
المقادير :
نص كيلو دقيق تورتة
6 بيضات
نص كباية ميه دافية
معلقة صغيرة محسن جيل بس تكون مليانة او نص معلقة كبيرة
نص لمونة
معلقة صغيرة فانيليا سايلة
هنحط كله على بعضه (الدقيق والميه والبيض والمحسن والفانيليا والنص لمونة ) ونضربهم مع بعض بالمضرب الكهربى لمدة ربع ساعة ولازم نتأكد اننا وصلنا لقوام المنقار يعنى لما نطفى المضرب وينزل منه العجين ينزل ع الخليط اللى فى الوعاء ويرسى عليه من فوق
ونكون داهنين صينية مستطيلة مقاس 24 *30 بالزيت او السمنة ومفروش فيها ورق زبدة نقصها على شكل الصينية ، نحط الخليط ده فى الصينية ونساويه بالاسباتيول عشان يطلع السطح متساوى وندخل الصينية الفرن على 180 درجة بس طبعا لازم الفرن يكون متسخن من قبلها بربع ساعة تقريبا ونسيب الصينية حوالى 40 - 45 دقيقة
وبعدين نقتح نختبرها بخلة السنان لو طلعت نضيفة تبقى استوت ونطلعها ولو طلعت فيها عجين يبقى لسه شويه وبعدين نطلعها تبرد ونلفها فى كيس وندخلها التلاجة.

مقادير الكريم شانتيه :
1/4 كيلو كريم شانتيه خام + نص كوب سكر + 500 مللى لبن مثلج

نضربهم بالمضرب الكهربى حتى يزيد القوام ونتركها فى التلاجة حتى نستخدمها فى حشو الكيكة .
مقادير كريمة الزبدة:
1 ونص كوب سكر باودر ناعم - نص كوب زبدة لينة - 4 معالق كبيرة لبن
نضرب الزبدة لحد ما تبقى كريمى وبعدين نحط عليها السكر الباودر ونضرب كويس لحد ما تبقى كريمى وبعدين نحط اللبن ونضرب كويس جدا وندخلها التلاجة .
للتزيين :
كيلو عجينة سكر موف وبنفسجى
ربع كيلو عجينة سكر احمر وبمبى وفوشيا ولبنى وبيج عشان المكياج

*هنطلع الكيكة من التلاجة ونقطعها تلات اثلاث مستطيلة ونضعهم فوق بعض ونحشيها كريم شانتيه بين هذه الطبقات
*هننحت الكيك على شكل شنطة ونغلفها بكريمة الزبدة وندخلها التلاجة تسقع
*هنفرد عجينة السكر الموف على الرخامة وتحتها نشا ونغلف الكيكة بيها
* هنعمل اسطوانة رفيعة جدا من اللون البنفسجى ونحدد بيها الشنطة وكمان على شكل مستطيل عشان غطا الشنطة
*هنعمل علامات بعجلة البيتزا المشرشرة ونشكل وردتين موف وبنفسجى من عجينة السكر وكمان كور صغيرة .
*هنعمل اسطوانه من عجينة السكر البنفسجى ونثبتها فى الشنطة بخلة الاسنان.

» تورتة عيد ميلاد